محمد أنور: البعبع الأعلى إيرادات في الخليج ويتفوق على الأجنبي.. ومكنتش أعرف الأكشن هيتعمل فيا

تحدث الفنان محمد أنور، عن مشاركته في فيلم البعبع، بطولة الفنان أمير كرارة، والذي عُرض في موسم عيد الأضحى بجميع دور العرض السينمائي، وحقق من خلاله نجاح كبير.

وقال محمد أنور خلال لقائه في برنامج الراديو بيضحك: أنا في الأول اتبعت الفيلم لي وعرفت أنه أكشن وحتة جديدة وأنا قولت بس أنا عايز أتعلم، ومكنتش أعرف أن الأكشن هيتعمل فيا أنا، أنا طول الفيلم بقيت أحسن واحد في مصر بيضرب، ونفسي مرة أضرب قلم.

وعن الإيرادات التي حققها العمل منذ عرضه في الخليج، فعلق محمد أنور قائلًا: فيلم البعبع أعلى إيرادات دلوقتي في الخليج متفوق على الأفلام الأجنبي، والناس في الشارع الموضوع متشاف هناك بشكل كبير وبالذات السعودية بسبب الجالية العربية، وردود الأفعال عظيمة الصراحة.

وتابع محمد أنور كاشفًا كواليس فيلم البعبع: أنا اللي تعبت في آخر مشهد بفيلم البعبع والفيلم قفل عليا وظهرت بجبس كامل، أنا اتبهدلت أوي في الفيلم ده وبحب الشغل والمهم إني أعمل اللي يرضيني ويرضي ضميري المخرج خده في الفيلم أو لأ دي بتاعته، أنا قعدت 8 ساعات في جبس بجد، وجابوا جبس بلدي ودهنوني به لأن الجبس العادي بيتكسر من الشمس.

محمد أنور يروي كواليس مشهد الحريق في فيلم البعبع: أمير كرارة قالي هتتسيط زي إبراهيم الأبيض

وأضاف: أنا بولع في الفيلم وبتخبطني عربية وحاجات كتير، وكانوا بيجيبوا ليا دوبلير في مشهد الولعة وأنا كنت مرعوب عليه، مهما كان متأمن بس بردوا، وأمير كرارة قالي عارف لو عملته أنت هتتسيط زي إبراهيم الأبيض، شوف السقا بعد الفيلم والله هتبقى زيه، رُحت قومت قولتلهم ينفع أنا أولع؟ قالولي أه بس خلي بالك لغاية دلوقتي إحنا في الأمان، وأول شوت عملناه خافوا يحطوه في الفيلم لتتخض الناس لأن النار كانت كبيرة وعدت وشي، وعيدناه كذا مرة.

أما عن تعاونه مع الفنان باسم سمرة، خلال أحداث فيلم البعبع، فعلق محمد أنور قائلًا: باسم سمرة أروق واحد في الشغلانة كلها، وفي الأول خوفت وهو بيدخل له نظرات وحركات، وآخر يوم تصوير حضنا بعض وكنا بندمع، وطول الوقت بينصحني وبيسألني أنا بقرأ ولا لأ وبيدني أسماء كتب، واكتشفت مع الوقت أنه من أطيب وأجدع الناس اللي ممكن أتعامل معاهم في حياتي، ويوم العرض الخاص كان فرحان بيا كأني ابنه.