ميدو يكشف التطورات الصحية لـ شيكابالا: صحته أحسن.. والاستعجال ممكن يجيب نتيجة عكسية
كشف أحمد حسام ميدو، نجم الكرة المصرية السابق، آخر التطورات الخاصة بالحالة الصحية لـ محمود عبد الرازق شيكابالا قائد الفريق الأول لكرة القدم بنادي الزمالك.
تصريحات أحمد حسام ميدو
وقال أحمد حسام ميدو في تصريحات تلفزيونية: "شيكابالا لما الفريق رجع من تونس، شعر بتعب وأعراض شبيهة بالكورونا ولما عمل التحليل، لقى في زيادة في الالتهابات اللي موجودة جوا جسمه فعمل المسحة الخاصة بكورونا وطلع سلبي لكن عنده كل الأعراض الخاصة بكورونا ومن يومها شيكابالا لم يخرج من البيت.
وأضاف نجم الكرة المصرية السابق: محمود شيكابالا النهاردة تم الحصول منه على تحليل دم، ونسبة الالتهابات قلت ورجعت لطبيعتها، وهو حاسس إنه بقى أحسن، لكن لازم ياخد وقته في العودة، الاستعجال ممكن يجيب نتيجة عكسية.
وواصل أحمد حسام ميدو: أنا لسه متكلم مع شيكابالا وهو الحمد لله كويس وده اللي بأكده لأهله في أسوان وجماهير نادي الزمالك.
وأكمل ميدو: أهل شيكابالا في أسوان مش مصدقين إن الخبر اللي انتشر عبر قناة الزمالك، عن إصابة شيكابالا ده مش صحيح، وقلقانين على شيكابالا جدا، كل ده من خبر غلط على قناة نادي الزمالك، لازم المنصة الرسمية تكون مصدر دعم مش ضغط.
وفي سياق متصل، طالب أحمد حسام ميدو، مسؤولي نادي الزمالك بإصدار بيان رسمي لتوضيح حالة محمود عبد الرازق شيكابالا قائد الفريق الأول لكرة القدم.
وقال ميدو في تصريحاته: شيكابالا أحد الرموز في نادي الزمالك، وأحلم بإنشاء متحف للزمالك وشيكابالا يستحق تمثال داخل هذا المتحف، مردفًا: شيكابالا غاضب للغاية من التناول الإعلامي الخاطئ لإصابته عبر قناة نادي الزمالك.
واختتم: لابد من نشر الزمالك لبيان رسمي لتوضيح حالة شيكابالا بشكل رسمي من جانب النادي، وشيكابالا رمز وقادر على التواجد والاستمرار مع الفريق لمدة عامين.
