ياسمين نيازي: جالي التهاب أعصاب طرفية بسبب الزعل وما زلت بتعالج منه

كشفت المطربة ياسمين نيازي، لأول مرة عن الأزمة الصحية التي تعرضت لها في وقت سابق، بجانب الحديث عن علاقاتها العاطفية.

وقالت ياسمين نيازي، خلال حوارها مع الإعلامية ياسمين عز في برنامجها كلام الناس، أنها أُصيبت بالتهاب في الأعصاب الطرفية، موضحة: التهاب الأعصاب ده كان بسبب زعل وما زلت بتعالج منه، والتعب ده لما جالي كان مفاجئ ومكنش فيه أي حاجة مرضية عندي، والدكتور قالي أنتي صغيرة مش معقول تضغطي على نفسك لدرجة إنك تبقي مش قادرة تمشي.

ياسمين نيازي عن علاقتها بالحيوانات: صاحبي هو كلبي

وتطرقت المطربة ياسمين نيازي خلال اللقاء للحديث عن علاقتها بالحيوانات، موضحة: صاحبي هو كلبي، ولما تعبت وجالي التهاب في الأعصاب الطرفية ومكنتش بمشي، وكنت على سريري وكلبي نايم تحت ورافع رأسه مستني أخف، وأول مرة قدرت أقوم فيها لوحدي من غير ما حد يساعدني عمري ما هنسى اليوم ده، لأن كلبي أول ما خرجت جالي جري وبقى يهوهو كتير على عكس عادته عشان ماما تنتبه ليا لأنه خايف إني أقع.

ووجهت ياسمين نيازي، رسالة للأشخاص الذين يتعمدون أذية الحيوانات، قائلة: ربنا خلق الحيوان لتوازن الكوكب، تعالوا نحاول نحبهم ونعيش مع بعض وهما أحسن مننا بكتير عندهم قلب.

ياسمين نيازي تتحدث عن علاقاتها العاطفية

وتحدثت ياسمين نيازي، عن علاقاتها العاطفية مُشيرة إلى أنه تم خطبتها من قبل، موضحة: كنت في علاقة خطوبة قبل كده وكنت بحب جدًا ولكن بعد العشرة لقيت نفسي مش مرتاحة، هو كان عايز مشاعر أنا مش هقدر اديها له.

كما روت ياسمين نيازي، موقفًا عندما تقدم أحد أقاربها لخطبتها ولكنه قوبل بالرفض، قائلة: أنا طفشت عريس واحد بس لأنه عمل حاجة استفزتني ولكن يمكن نيته أنه هيدخل البيت من بابه وكده، ولكن أنا كنت برا البيت ووالدتي كانت عند جدتي واتصلت بيها سألتني عليه قولتلها ماله؟ قالتلي ده كلم والدتك.

وأضافت أن والدتها أخبرتها بتقدم أحد أقاربها لخطبتها، موضحة: لما روحت البيت لقيت ماما بتقولي إن في حد كلمها وقالتلي ليه يا بنتي بتعامليه كده؟ ده خايف منك قولتلها هو عايز إيه قالتلي ده عايز يتجوزك، ولكن أنا قولتله الرأي رأي بنتي، قولتلها هاتي تليفونك وعملتله بلوك لأنه كلم ماما ومكلمنيش أنا.