سحر رامي: الفنانون مش بيلعبوا بالفلوس لأن مش كلهم محمد رمضان

تحدثت الفنانة سحر رامي، عن صعوبات مهنة التمثيل، مؤكدة أن الفنانين ليسوا أغنياء كما يزعم البعض، كما كشفت عن رأيها بمقارنة محمد رمضان بـ الراحل أحمد زكي.

وقالت سحر رامي لـ القاهرة 24: الناس فاكرين أن كل الفنانين بيلعبوا بالفلوس وعايشين في قصور، ولكن مع الأسف مش كلنا محمد رمضان ومننا مش لاقيين فلوس يصرفوا على عيالهم وبيوتهم؛ لأن مهنة الفن صعبة وكلها حظ ومواسم.

تصريحات سحر رامي

وواصلت سحر رامي: الزمن اتغير ودلوقتي كل فنان بقى معاه 5 مساعدين، واحد يولع له سيجارة ومساعد تاني يجبله أكل، إحنا زمان مكناش كدا ومع الأسف التكنولوجيا والتمثيل بقى أسهل عن زمان والمشاهد ممكن تتقطع والدنيا تطورت عكس زمان ولكن مع الأسف الفكر راح، وأي واحد بيقول نكتة بيفتح الكاميرا وبيعملها مسلسل.

كما تطرقت سحر رامي للحديث عن مقارنة محمد رمضان بـ الراحل أحمد زكي، قائلة: مقارنة محمد رمضان مع أحمد زكي مستحيلة؛ دا ظلم لأن مفيش حد شبه التاني أنا شخصيًا مش شبه نفسي كمان 10 سنين، ومفيش حاجة اسمها فنان له خليفة، بأمارة مين محمد رمضان خليفة أحمد زكي؟ دا العصر مختلف والأدوار مختلفة وحتى الأرقام اتغيرت مكنش فيه حد زمان بياخد المبالغ الموجودة دلوقتي.

وسبق وكشفت سحر رامي عن موقفها من آراء الشيخ الشعراوي، وقالت في تصريح سابق لـ القاهرة 24: الشعراوي أفكاره متطرفة وضيع ناس كتير وراه، وكان بيحرم الفن ونقل الأعضاء ومع ذلك لما تعب راح نقل كلى، طب مسابش نفسه يموت ليه؟