نجيب ساويرس: خسرت 252 مليون دولار مؤخرا وده مش هيأثر في قراراتي (فيديو)
نجيب ساويرس، كشف رجل الأعمال المهندس نجيب ساويرس، حقيقة ما يثار ويتردد عن خسارته 252 مليون دولار خلال الأيام الأخيرة منذ بداية العام الجديد.
خسائر نجيب ساويرس
وأكد نجيب ساويرس خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": "خسرت أكتر من 252 مليون دولار".
قوة نجيب ساويرس
وتابع: "ربنا بيبعت وربنا بياخد إيه المشكلة، وأحلف إني أنا عمري ما الفلوس تقدر تأثر فيا ولا في قراراتي ولا معتقداتي ولا في اللي بقوله".
Advertisements
إنقاذ الدولة وسداد أقساط الديون
صفقة رأس الحكمة، في نفس المداخلة أشاد رجل الأعمال المهندس نجيب ساويرس، بإبرام الحكومة صفقة رأس الحكمة مع الجانب الإماراتي، مؤكدًا: صفقة لها وضع خاص ولا أعتقد أنها ستتكرر، وتعتبر فريدة من نوعها نظرا لتوقيتها مع مرور الدولة بأزمة كبيرة في سعر الصرف وسوق مضطرب في العملة وتوقف المصانع وعدم القدرة على تلبية الاحتياجات من أجل الإنتاج وارتفاع أسعار السلع الغذائية والديون التي تقدر بـ170 مليار دولار وأقساط ديون مستحقة الفترة المقبلة.
وأضاف خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": "واضح إن مكنش عندنا ما يكفى لسداد أقساط الديون، فلما ييجي حد وينقذك في الوقت ده فهذا أمر كويس جدا".
سعر أرض رأس الحكمة
وأوضح: "أنا راجعت صفقة رأس الحكمة، ولقيت إن سعر الأرض أعلى من اللي إحنا إشترينا به كشركة في نفس المنطقة، فلما الجانب الإماراتي يجي يشتري منك الأرض وبعدين يدخلك معاه شريك بـ35% فهذا أمر لا يصدق إحنا نفسنا مبنعطيش الحكومة أكتر من 27% وبعدين الأهم الرقم هيعمل سيولة دولارية ويخلينا نقدر نسدد كل اللي علينا ونفتح الاعتمادات للناس اللي شغلها واقف، ونقدر نوصل لسعر الدولار الواقعي ودي مؤشرات مالية".
دعم إماراتي لمصر
وأوضح: "الجانب الإماراتي دفع 24 مليار دولار فقط في الأرض وعلشان يبني الأرض محتاج 3 أو 4 أضعاف الرقم اللي دفعه في الأرض، وبالتالي الفلوس دي كلها هتبقى في مشروعات داخل مصر، واستثمارات قوية لصالح البلد، يعني هما دافعين 24 مليار دولار ثمن الأرض ومع ذلك أدخلوا الحكومة كشريك بـ35% بصراحة أنا لو اتعرض عليا الصفقة دي ماخدهاش، الصفقة دي فيها جانب إنساني وأشقاء بيساعدونا وشعب طول عمره بيحب مصر وأنا مش بطبل لحد الشعب الإماراتي بيعاملوا المصريين هناك بشكل خاص، وطول عمرهم واقفين ورانا وعندهم قناعة إن مصر بوابة الأمة العربية ولازم يقفوا وراها أيًا كانت المواقف والظروف والمهاترات من اللي فاهم واللي مش فاهم".
ولفت: "كمية المشاريع القبيحة اللي اتعملت في الساحل الشمالي ومساحات الشواطئ اللي باظت الإماراتيين لما يجوا هيخلوا المستوى زي مدينة دبي، لإنهم عندهم فكر متطور ومنظمين واللي ينزل دبي وأبو ظبي يحلف بيهم، وإحنا كمطورين هنعلي من أسلوبنا ونقلل من أسعارنا ونخدم الناس أحسن ولما يجوا يبنوا هيشغلوا كل الشركات المصرية، وهيوفروا فرص عمل كتير والمرتبات هتعلى وهيخلقوا مدينة جديدة على أعلى مستوى نصف الساحل الشمالي وكلنا هنستفيد ومشاريعنا جنبهم أكيد هتستفيد، مينفعش في ظرف زي ده ويجي حد يساعدنا ونيجي نلاقي اللي يفهم وميفهمش يتكلم".
وأشار: "مشاريع الإماراتيين بتبقى مظبوطة وبيستعينوا بمكاتب عالمية تعملهم معمار على أحدث ما توصل إليه العلم وبيعملوا دراسات جدوى على أعلى مستوى، وبيحافظوا على البيئة وهيعملوا مطار دولي في منطقة مفيهاش مطارات للسياحة العالمية، وبيعملوا مدن ذكية وبيطوروا أي منطقة بشكل كبير".
وأكمل: "فيه ناس يقولك هياخدوا أرضنا ده كلام مينفعش يتقال يعني هياخدوها ويرجعوا بيها على دبي ولا أبو ظبي يعني".
صفقة رأس الحكمة فرصة للمراجعة
واستطرد: "صفقة رأس الحكمة يجب أن تكون فرصة للمراجعة، مراجعة كل شيء لإن كل الناس مش راضية عن طريقة الإدارة الحالية، ولا التدخل الحكومي في كل حاجة والقطاع الخاص المخنوق، فيه حاجات بدأت تحصل كويسة ولكن يجب مراجعة كل المشروعات اللي بتتعمل وترتيب الأولويات".
------------------------------------------
و
