هشام ربيع بعد انفصاله عن بوسي: خسرت بسببها 21 مليون جنيه.. وكنت ببعت لوالدها مرتب شهري دون علمها
كشف رجال الأعمال هشام ربيع، أنه دخل السجن بسبب طليقته بوسي وخسر بسببها 21 مليون جنيه، حيث سُجن لمدة 4 أشهر بتهمة الاستيلاء على شيكات بمبلغ 8 ملايين جنيه من المنتج الراحل وليد فطين طليق بوسي الأول، ولكنه حصل مؤخرًا على براءة من التهمة، وبمجرد خروجه من السجن أعلن طلاقه من المطربة بوسي.
وقال هشام ربيع في حديثه مع القاهرة 24: دخلت بسببها السجن لأن كان عليها شيكات وخسرت بسببها 21 مليون جنيه وربنا يسامحها، مش عاوز منها حاجة غير إنها تبعد عني، عاوز أشوف شغلي، وببني مول جديد ولكن محدش رفع سماعة تليفون عليا يشتري أو يأجر بسبب الشائعات لأنها أذتني في شركات المولات اللي بملايين الجنيهات.
وأشار هشام ربيع إلى أنه كان حريصًا على أن يرسل لوالد بوسي الراحل مرتبًا شهريًا دون علم بوسي، قائلًا: محدش بيشكر في نفسه لكن ربنا بيظهر الحق وربنا يعلم أني كنت ببعت لأبوها مرتب شهري وبقول له بوسي اللي بعتاه وبطلب منه يدعي لها، علمتها تدفع صدقات تعليم للأيتام بأحد الجمعيات وقلت لها دول كام سنة عايشنهم وفي النهاية هنقابل ربنا والآخرة أوسع، دوري على الآخرة مش الدنيا.
وتابع رجل الأعمال هشام ربيع: الله يسهلها مش عاوز منها حاجة ولا الفلوس اللي اتصرفت مش بتفرق معايا الفلوس وبعتبرهم صدقة من ضمن الصدقات أو عربية واتخبطت والحمد لله الواحد رجع لبيته ولمراته اللي كنت مقصر معاهم ومش حاسس بالتقصير ده من ناحيتهم.
سبب طلاق بوسي وهشام ربيع
وقرر هشام ربيع الانفصال عن بوسي بعد زواج عام وأشهر قليلة من زواجهما، بعد خروجه من السجن وبراءته من تهمة الاستيلاء على شيكات من وليد فطين طليق بوسي الأول، مشيرًا إلى أنها لم تقف بجانبه في محنته رغم أنها السبب، وقال حينها في تصريحات لـ القاهرة 24: وقفت معاها وجبت لها حقها، لأنهم كانوا بيبتزوها وعايزين فلوس فملاقوش قدامهم غير إنهم يعملوا لي مشكلة ولفقوا لي قضية، ولما دخلت السجن ملقتهاش جنبي، أم ولادي كانت يوميًا بتنزل تتابع الشغل وتجيبلي أكل.
زواج بوسي وهشام ربيع
ويُشار إلى أن بوسي تزوجت بوسي من هشام ربيع في شهر مايو العام الماضي في حفل زفاف ضخم أقيم بأحد فنادق القاهرة الكبرى، وسط حضور عدد كبير من نجوم الفن والمشاهير ورجال الأعمال.
