باهر دويدار: كتبت مسلسل حكايات بنات قبل عرضه بـ 7 سنوات.. وكان رهانًا للدراما الذكورية وقتها… خاص

قال المؤلف باهر دويدار، إنه لم يستطع كتابة أجزاء جديدة من مسلسل حكايات بنات، الذي تم عرضه بالفعل، مشيرا إلى أن الجزء الأول من العمل واجه صعوبات عديدة ليخرج إلى النور.

وأضاف باهر دويدار في تصريحات خاصة لـ القاهرة 24: أنا سنًا مبقتش أعرف أكتب حكايات بنات؛ أنا داخل على الخمسين سنة والمسلسل عايز اللي يكتبه يكون من جيل البنات، وأنا لما كتبته كنت في سن البطلات اللي في المسلسل اللي بتكلم عنهم، وتفاصيل حياتهم دلوقتي مش عندي ومش عارفها.

وكشف باهر دويدار الصعوبات التي واجهها الجزء الأول من مسلسل حكايات بنات قبل تنفيذه بالفعل، قائلًا: فكرة إن المسلسل متشاف بالطريقة دي لحد دلوقتي دي بتسعدني جدا وبتثبتلي إن الطريقة اللي اتكتب بيها المسلسل كانت صح، والمسلسل ده أنا بدأت أكتبه في سنة 2005 وطلع في سنة 2012؛ وده بسبب إنه كان بيترفض إنتاجيًا؛ لأنه كان مختلف عن أشكال الأعمال اللي كانت بتطلع وقتها.

باهر دويدار: الدراما وقت حكايات بنات 1 كانت ذكورية

وواصل باهر دويدار: والصناع كانوا شايفين يعني إيه مسلسل بطولة أربع بنات وأدوارهم أكبر من الأبطال الولاد، لأن وقتها كانت الدراما ذكورية، وده كان رهان لأن اللي كان سائد في الوقت ده إن العمل يبقى بطله راجل وجنبه ممثلة، ومن الصعوبات التانية إن العمل اتعرض في موسم رمضان، ودراما رمضان وقتها كان ليها شكل محدد، زي دراما أستاذ نور الشريف الله يرحمه ويحيى الفخراني ويسرا، فهو كان مختلف عن كل ده.

باهر دويدار: سر نجاح حكايات بنات الدائم هو إنه حقيقي.. وبيناقش مشاكل مش لحظية

وأكد باهر دويدار، أن تجربة مسلسل حكايات بنات الجزء الأول كانت رهانًا بالنسبة له، مضيفا: وكمان كان رهان بالنسبالي لأنه كان أول أعمالي الاحترافية، وأنا أزعم إني بقيت أكثر احترافية دلوقتي، والمسلسل ده طلع بشكل تلقائي وطبيعي أكتر من احترافي، وسر نجاحه في إنه كان حقيقي وصادق، والمشاكل اللي ناقشها مكنتش لحظية، لا دي كانت بتحصل وهتفضل تحصل للبنات، وفكرة الأزمة اللي بتُحيط علاقة الست بالراجل.

مسلسل حكايات بنات 1

ويذكر أن الجزء الأول من مسلسل حكايات بنات عرض في موسم رمضان 2012، وشارك في بطولته كل من: الفنانة صبا مبارك، دينا الشربيني، ريهام أيمن، حورية فرغلي، كريم فهمي، عمرو صالح، وغيرهم، والعمل من تأليف باهر دويدار، وإخراج حسين شوكت.