تامر حسني: اللي بيسأل فين ربنا مش هرد بالآيات والأحاديث.. بس يمهل ولا يهمل

وجه الفنان تامر حسني نصيحة لمتابعيه الذين يتساءلون عن وجود الله في حل خلافاتهم، حيث كان حريصًا خلال الفترة الماضية على التقرب من الجمهور وتوجيه العديد من الرسائل لهم.

ونشر تامر حسني عبر حسابه الشخصي على موقع الفيس بوك، وكتب: في الوقت ده ناس كتير إيمانها بربنا ممكن يتزعزع أو ينهار ويقولوا طب ربنا فين مش هرد بالآيات والأحاديث عشان في ناس أحق مني يتكلموا بلغة الدين بس أنا هرد رد بسيط من واقع الدنيا، أنت لو دخلت فيلم وجالك تليفون فاستعجلت ومشيت في ربعه الأولاني هل تقدر تحكم على نهاية الفيلم أكيد لأ يعني متحكمش على حاجه لسه مش خلصانة.

منشور تامر حسني

وتابع تامر حسني: طب الدنيا لسه شغالة مخلصتش يعني متعرفش بكرا ربنا شايل ايه متستعجلش وتحكم على الدنيا وأنت لسه مشوفتش مرحلة النصر اللي ربنا وعد بيها أصلًا في قرآنه متحكمش دلوقتي حكمك هيكون غلط احنا لسه مكملناش الدنيا للآخر، يمهل ولا يهمل واللي راحوا دول جريوا على الجنه اللي هي الحياة الأساسية حياة الخُلد راحوا دار الحق ومشيوا من دار الباطل.

وأضاف تامر حسني: يا جماعة الدنيا دي ولا حاجة دي دار باطل فيها الشر والكره والحقد والظلم، لكن الناس دي راحت لحياه كلها حب وخير وسلام وفرح ولما في الآخره نشوف كل حد كانت حياته صعبة ومليانة معاناه ازاي ربنا كافئه على صبره وتحمله من كل اللي شافه وكرمه بأجمل نعيم الجنه هنقول ياريتنا كنا إحنا الصبر يا جماعة والثقة في وعد ربنا.

تامر حسني: إن وعد الله حق

وختم تامر حسني حديثه: الدنيا دلوقتي وسكان الأرض انقسمت 2 ناس إيمانهم راح وناس اتمسكوا بعقيدتهم أكتر ودول أول ناس كسبوا معركة الدنيا، ثقوا في كاتب الدنيا العظيم أنكم لازم هتسقفوا في النهاية من حلاوة نصره وهو بينصر المظلوم بمعجزة من عنده تتحقق في الوقت المناسب اللي يعلمه هو مش إحنا والله والله والله لازم يبقى معندناش شك نهائي في رحمته وفضله اكسبوا المعركة يا جماعة اوعوا إيمانكم بربنا يتهز احنا كلنا أصلًا عايشين في اختبار ولازم ننجح فيه إن شاء الله هتشوفوا بعنيكم أكبر رد من ربنا كما وعد في قرآنه الكريم ثقوا في الله أن وعد الله حق.