أحمد حلمي يكشف قصة مؤلمة عن فترة مرض والده، وسر رفض والدته العيش معه (فيديو)
أحمد حلمي، قال الفنان أحمد حلمي: "من أكثر اللحظات المؤثرة جدا في حياتي ولم أنساها لما أبويا ضربني بالقلم وكان عمره ما مد ايده عليا".
قصة طريفة لأحمد حلمي فترة الطفولة
وأضاف خلال لقائه مع الإعلامي أنس بوخش عبر قناته علي "يوتيوب": "خالي غاوي يربي حمام بأنواع غالية وبعدين روحت أنا وفتحت شباك الأوضة فالحمام طار، ومكنتش وقتها أعرف أن الحمام غالي ولا لأ، وبعدين خالي اشتكاني لأبويا كان خالي مخه صغير، فجاء أبويا شاف المنظر وسأل مين اللي عمل كده فكذبت وقلت أخويا خالد فهو مصدقنيش وضربني أنا لإنه عارف إني بكذب، وكانت المفارقة الرهيبة أن الحمام طلع بيرجع تاني يوم الصبح، وافتكر ان وقتها زعلت واتضايقت وعيط".
Advertisements
أمنية أحمد حلمي
ولفت: "أحيانا أتمنى أرجع صغير علشان أعيش حاجات ملحقتش أعيشها أو نفسي أكررها، أبويا مات وأنا ملحقتش أشبع منه ولا أعيش معاه المرحلة اللي هي بتاعت الصحوبية، هو مات وأنا في أوائل الجامعة وبعدين علشان هما قاعدين في بنها وأنا قاعد في القاهرة مكنتش بشوف أهلي كتير".
وتابع: "ملحقتش أحكي لأبويا ويحكيلي ونخرج ونرغي ونتكلم، وهو كان مريض ومر بفترة صحية صعبة، وفترة مرضه كانت صعبة جدا على لإني وقتها حسيت بالعجز ومش عارف أعمل حاجة، حد بتحبه راقد وانت مش عارف تعمل حاجة، ولما توفى مشافش ولادي مفيش إلا بنتي الكبيرة كان عندها 3 سنين شافها".
لحظة صعبة علي أحمد حلمي
وأشار الفنان أحمد حلمي: "لحظة وفاة أبويا كانت صعبة وهو كان راجل صامت ومشاهد أكتر منه متكلم وحسيت بعد كده أنه له فضل كبير في تكويني وصفاتي وزعلان اني ملحقتش أخطف من وقت ابويا كتير وأتمنى الزمن يرجع بيا علشان ابقى معاه لإنه وحشني جدا، وبعد وفاته حاولت كتير أجيب أمي تعيش جنبي مبترضاش مش عايزة وحابة تبقى في بيتها وكانت امنيتي تبقى ساكنة في الشقة اللي جانبي بس احترمت رغبتها في البقاء في بيت والدي وأنا عمري ما هاكون أناني".
تربية أحمد حلمي
ولفت: "أبويا وأمي يعتبروا مربوناش كان فيه حرية في التربية ومكنش فيها الشكل التربوي المعتاد ده لأ وده اَه سابوا الجينات تاخد مجراها فالجينات بهتت علينا اننا نبقى مسئولين ونحب بعض كإخوات، وطلعنا انا واخواتي بنحب بعض بدون إرشادات فبحس ان كان فيه يد خفية بتربينا"
عجز أحمد حلمي خلال فترة مرض والده
وأكد: "تألمت كثيرا بعجزي خلال فترة مرض أبويا لإني مكنتش قادر اعمل له حاجة، وافتكر لما كنت بروحله المستشفى فالعناية المركزة كنت اشوفه من خلف الزجاج وده شئ بشع ومن المشاعر البشعة إنك تشوف حد بتحبه في لحظة صعبة وسط الأجهزة والخراطيم، وفاكر مرة لما فتح عينه وبص وشافني وكنت لوقتها لوحدي وقتها شاورلي بصباعه لفوق يعني ربنا يتولانا برعايته ووقتها كانت بيعمل عملية قلب مفتوح والعملية كانت المفروض تاخد 6 ساعات هو خرج بعد 3 ساعات وكان كويس، بس بعد كده مات بمرض تاني السرطان".
رؤية والد أحمد حلمي
وتابع: "بحلم بأبويا كتير ومعظمها رسائل وبابقى وفيه حلم كان بيزعقلي علشان انا بسجد غلط وانا بصلي وفي الرؤية قال لي ازاي انت بتسجد غلط ومعرفتش ايه بسجد غلط".
ونقدم لكم من خلال موقع "فيتو"، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي، الدوري المصري، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية، بالإضافة للنقل الحصري لـ أخبار الفن والعديد من الأنشطة الثقافية والأدبية.
