أحمد السقا: خسيت في مسلسل حرب.. وقررت معملش دور الإرهابي بشكل تقليدي وبعالج صوتي بسببه

تحدث الفنان أحمد السقا عن تفاصيل مشاركته في مسلسل حرب مع الفنان محمد فراج، خلال حواره مع المذيعة فاطمة مصطفى في برنامج الراديو بيضحك.

كواليس مسلسل حرب

وقال أحمد السقا خلال حواره: بالنسبة لشكلي المرهق في المسلسل هو إني خسيت ونزلت وزني الفترة اللي فاتت؛ لأني كنت باخد كورتيزون ولما وقفته بعناية الأطباء بقيت فرحان بشكلي في المسلسل.

أحمد السقا من مسلسل حرب

وأضاف: وخدت قرار إني مش هشتغل دور الإرهابي بالشكل التقليدي اللي بيكشر ويزعق ويتكلم بلغة الدين ديمًا أنا هعمله إنسان عادي وجاحد عشان يوصل للناس.

وتابع: أنا بشتغل مع فريق عمل قعدنا نشوف هنعمل فرق السن إزاي، والدقن اللي كنت بعملها في الأول كان تركيبها بياخد ساعة ونص لأنها بتترسم شعرة تلو الأخرى عشان تبان طبيعية، أما فيما يخص هدوء الشخصية لما تشوفي النهاية هتعرفي إن الراجل ده مش صاحب مبدأ ومش عايز احرق الأحداث، واللي كان بيحركه حاجة تانية خالص.

السقا: مكنوش مصدقين إني وافقت على مسلسل حرب

أما عن شعوره بالخوف من تجسيده لشخصية شرير عكس الانطباع الذهني له لدى الجمهور، قال أحمد السقا: لا خالص، بعد ما قعدنا ووافقت وطلبت التأجيل الكام يوم دول وكلمت فراج ولعب دور جميل وساندني وبريقه منعكس عليّا، كل الناس كانت مستغربة إني وافقت، وكان هدفي إني اتكره؛ لأني لو اتحبيت وأنا إرهابي تبقى مصيبة سودا، الحمد لله ربنا وفقني في تحضير الشخصية مع فريق العمل ووصلنا لشكل خارجي كويس.

السقا: اشتغلت من طبقة صوت تعباني وباخدلها أدوية

واستطرد أحمد السقا: اشتغلت من طبقة صوت لحد دلوقتي تعباني.. الطبقة عريضة.. لحد دلوقتي باخد أدوية، وقولت مش هعمله بالشكل التقليدي وأجري على الله، والحمد لله لاقى استحسان الناس.